2024 жылы Мемлекет басшысы Қасым-Жомарт Тоқаев Наурыз мейрамын тойлаудың жаңа дәстүрін ұсынған еді. Яғни, 14 наурыз күні басталатын – Наурызнама онкүндігі жобасы. Сонымен қатар, барлық облысқа, қала мен ауданға бірдей логотип бекітілді. Логотиптің өзі - үлкен мәнге ие. Өйткені, суреттегі үш қызғалдақ - үш кезең. Тарихымыз, бүгінгі күніміз және келешек.
Атырау облысы, жалпы Батыстықтар үшін «Көрісу» күні таңсық болмады.
Фольклорлық нұсқаларда кездесетін:
«Наурыз күні кәрі-жас,
Құшақтасып - көріскен.
Жаңа ағытқан қозыдай,
Жамырасып, өріскен» деген өлең жолдары дәл осы күнді бейнелегендей. Көшеде бірін-бірі көрген таныстар, танымайтын жандар, еңбектеген баладан, екейген кәріге дейін бір-біріне жүздерінен мейірім төгіп, қолдарын ұсынып, жақсылық тілеп жатқанын көруден артық қандай бақыт керек адамға?
Осы бір ағыл-тегіл пейіл, шын ықылас, ілтипат тек табиғат – Ананың түлеп-жасарғанын ғана білдірмейтіндей, адам жанының, көңілінің, жан дүниесінің де бүр жарып, жапырақ жайып, мейірімге толғанын, өзгеше бер рухани өрлеу әлеміне қол созғанын танытқандай! Адам мен табиғат гармониясы деген – осы, әне!
Мәдениет және тілдерді дамыту басқармасы және Атырау театры бұл күнге концерттік бағдарлама ұсынды. Дауыстары алты қырдан асқан әншілер мен мың бұралған бишілер, домбырасының шанағына тұтас бір Даланы көшіріп алғандай, ат тұяғының дүрсіліне дейін айнытпай салған, он екі перне, егіз шектен ғажап әуен төгілдірген күйшілер, сахналық қойылым, бәрі-бәрі бір-бірімен ерекше тұтастықта көрерменді баурап алды.
Ең кереметі, Наурыз айында он сегіз мың ғаламның тылсымынан жеткен көктем көшінің символындай болып, Атыраудан Германияға рухани көш жетті. Яғни, Берлин қаласында «Сармад» этно фольклорлық ансамблі Әзербайджан мәдени орталығында «Көшпенділер рухы» концертін өткізді. Елшілер мейрам тойлауға келген халыққа, Наурызнаманың мәнін түсіндірген. Осылайша, берекелі басталған іс-шара 22-сіне дейін жалғасты. Әрбір мекеме, оқу орны, партия, орталықтар өз отауларын тігіп, Исатай-Махамбет алаңы қос батырдың ауылындай жайнады. Мәселен, Атырау университеті Наурызға арналған шараны қазақ үшін көп еңбек сіңірген, түркілерге Наурызды қайтарған, біртуар азамат - Өзбекәлі Жәнібек туралы прологпен ашты.
18 наурыз - Ұлттық киім күні, көк туымызды желбіретіп шеру өтті. Адам саны 3000-ға жуық. Қалаға жұмыс бабымен келген шетелдіктер мұндай шеруді бұрын-соңды көрмесе керек, таң-тамаша болды. Оның үстіне, қазақ халқы үшін Жаппардан келген нығмет, ат мен түйенің әбзелдеріне дейін ою түскен. Сырттай бақылап тұрған адамды бір жылы сезімге бөлейді. Дәл осылай, он күндік мәдениетті ысырапсыз, бірлігі бұзылмай атап өткеніне қуанып, осындай шаралар тағы да жалғасса ғой дейсіз.
Сондай-ақ, Наурыз брендке айналғанының көрінісі - тұтынушылар үшін жасалған маркетинг. Бүкіл дерлік сауда орындары, сауда орталықтары мен ірі бизнес өкілдері, түрлі акциялар ұйымдастырды. Биылғы Наурыз мерекесінің әлем мұсылмандары ұстап жатқан қасиетті Ораза айымен тұспа-тұс келуінің өзі мейрамның мәні мен мағынасын биіктетіп жібергендей. Ата-бабамыз ұстанған дәстүрлі дін аясында аузын бекіткен Атыраулықтар ғасырлар қойнауынан бүгінге жеткен ұлтымыздың рухани құндылығының сақталуына, жас ұрпаққа мұра болып қалуына бір кісідей атсалысты. Дін мен дәстүр ұштасып, мейрамды естімеген адам жоқ. Спорт күні, мықтылар алаңға шықты. Қол күресіп, бұқа тартысып, қой көтеру және басқа ойындарға қатысқан үлкен-кіші, бала-шаға көз алдымызға ата-бабаларымыздың көне ғұрпын, салты мен дәстүрін жаңаша нақышта жеткізгендай болды. Бір кездердегі Қиғаш өзені бойындағы Кордуан жәрмеңкесі, атақты Қараөткел жәрмеңкесі, ондағы ырду-дырду думан, қайнаған тірлік көз алдыма келгендей болды. Дәстүр жалғастығы деген осы емес пе?
Самарқанның көк тасы қалай жібіді? Осының өзі халық жадындағы сенім, аксиомаға айналған символ ма деп қалдым. Көңілдердің көк мұзы еріп, бір-бірін көптен көрмеген ағайын-туыс осы жерде көрісіп, жүректер жылынып, жан шуағына бөленген күндер болды бұл бір. Көптеген мәдени мекемелер, мәдениет қызметкерлері жарғақ құлақтары жастыққа тимей, осы он күн бойына үй-күйін, тыныштығы мен демалысын ұмытып, Исатай-Махамбет атындағы алаңнан табылды. Бекітілген жұмыс уақыты өзгертіліп, Ғ.Сланов атындағы облыстық кітапхана Наурызға орай үш күн бойы түнгі он екіге дейін қызмет етті.
«Ынтымақ» күні Қазақстан халқы Ассамблеясы қызықты бағдарлама ұсынды. Түрлі этнос өкілі құттықтау білдіріп, ұлттық өнерлерін тарту етті. Жасы да, үлкені де бар татулықтың бейнесі болды. Жергілікті әншілер мен арнайы шақырылған қонақтар аудандарда гала-концерт өткізіп, жұртшылықтың көңілін көтерді.
Жұмысшы мамандықтар жылы аясында, Атыраулық жұмысшы жастар ірі компаниялардан қолдау тауып, Наурызға тарту жасады. Бұл - ең ғажап тартулардың бірі. «Ахау-керім» халық әніне кавер түсіріп, әлеуметтік желіде таратты.
Атырау облысының әкімі, Серік Шәпкенов:
-Өздеріңіз білесіздер, кезінде түбімен жойылып кетуге қалған мейрам. 1988 жылы дәстүріміз, бір айналып қайта оралды. Тәуелсіздігіміз қолымызға жетіп, ақ жарқын тілек үзілмеді. Амандық-саулық тілеп, жыл сайын жаңарамыз. Наурыз құтты болсын!
Ең бастысы, мәдениетсіздік болмады. Шашылса - шашу, төгілсе - ән мен жыр төгілді. Шуласып «Бір жасыңызбен!» , «Наурыз құтты болсын» десті жұрт.
