Алматыдағы Қазақстан Республикасының Ұлттық кітапханасында француз тарихшысы Мари Фавероның «Алтын Орда. Дала империясы әлемді қалай өзгертті» кітабының қазақша нұсқасы таныстырылды.
Ғалым еңбегінде Алтын Орданы тек әскери жорықтар тарихы емес, Еуразияның саяси, экономикалық және мәдени кеңістігін қалыптастырған ірі империя ретінде қарастырады. Кітапта сауда, дипломатия, қалалар, ақша айналымы және Шығыс пен Батыс арасындағы байланыстар тың деректер негізінде зерделенген.
Зерттеу араб, түркі, орыс, латын, парсы және көне итальян тілдеріндегі жазба деректерге, археологиялық және нумизматикалық материалдарға сүйенеді.
Мари Фавероның әлемге танылған еңбегінің қазақша жарық көруі Алтын Орда тарихына қатысты заманауи ғылыми көзқарастарды қазақ оқырманына жақындата түсті.
