1992 жылғы 29 қыркүйекте Алматыда Дүниежүзі қазақтарының тұңғыш құрылтайы басталды.
Тәуелсіздігін енді ғана алған Қазақстан үшін бұл жай ғана жиын емес, әлемнің әр түкпіріне шашыраған қазақтардың тарихи Отанда алғаш рет бас қосуы еді. Қазақстан тарихы порталының дерегінде құрылтайға 33 елден 800-ден астам өкіл келгені көрсетіледі.
Түркия, Германия, Франция, Норвегия, Моңғолия, Қытай, Аустрия және басқа мемлекеттерден келген қандастар Алматыда жүздесті. Құрылтай барысында Дүниежүзі қазақтары қауымдастығын құру, оның жарғысын қабылдау және басшылық органдарын сайлау мәселелері қаралды.
Бұл басқосу тәуелсіз Қазақстан мен шетелдегі қазақ диаспорасы арасындағы байланысты жаңа деңгейге шығарған тарихи кезеңдердің біріне айналды.
